ខេត្តព្រះវិហារ ៖ ជំលោះផ្ទៃក្នុងគ្រួសារមួយរវាងប្តី និងប្រពន្ធ នៅក្នុងភូមិភារកិច្ច ឃុំប៉ាលហាល ស្រុក ត្បែងមានជ័យ ខេត្តព្រះវិហារបានកើតឡើងខណៈប្តីឈ្មោះសុខ ជឹម អាយុ៤០ឆ្នាំ ជាកម្មករសំណង់ ពេល ត្រឡប់ពីផឹកស៊ីស្រវឹងមកដល់ផ្ទះវិញ ក៏រករឿងប្រពន្ធឈ្មោះគង់ សុភា អាយុ៣៨ឆ្នាំ ។ គ្រួសារ ដែលមានជំលោះនឹងគ្នានេះ ពុំមានទីកន្លែងរស់នៅពិតប្រាកដទេ ដោយប្រពន្ធឈ្មោះគង់ សុភា បានសុំដី លំនៅឋានរបស់បងថ្លៃប្រុសឈ្មោះសុខ ធី ជានាយប៉ុស្តិ៍ប៉ូលិសឃុំពោធិ៍ ស្រុកត្បែងមានជ័យ ដើម្បី សង់ផ្ទះនៅបណ្តោះអាសន្ន ។ ទាក់ទិននឹងអំពើហិង្សានេះត្រូវបានឱ្យដឹងថា នៅវេលាម៉ោង៧យប់ថ្ងៃទី៤ ឧសភា បន្ទាប់ពីផឹកស៊ីស្រវឹង មកដល់ផ្ទះ ឈ្មោះសុខ ជឹម បានរករឿងប្រពន្ធ ហើយទាញពូថៅ និងកាំបិតប៉័ងតោដេញកាប់។ ដោយ ការភ័យខ្លាចស្ត្រីជាប្រពន្ធបានរត់ទៅឱ្យបងថ្លៃប្រុសជានាយប៉ុស្តិ៍ជួយ នៅពេលនោះលោកអនុសេនីយ៍ត្រី សុខ ធី ក៏បានចេញពីក្នុងផ្ទះមកជួយ និងឃាត់កុំឱ្យមានការឈ្លោះប្រកែកគ្នាដែលនាំឱ្យខ្មាសអ្នកជិតខាង។ ជាអកុសលលោកនាយប៉ុស្តិ៍សុខ ធី ត្រូវបានប្អូនថ្លៃឈ្មោះសុខ ជឹម កាប់ពីរកាំបិតប៉័ងតោត្រូវចំក្បាល មួយកាំបិតត្រូវកណ្តាលខ្នងមួយកាំបិតធ្វើឱ្យលោកសុខ ធី ដួលសន្លប់មួយរំពេច ហើយត្រូវបានអ្នកជិត ខាងជួយនាំមកកាន់មន្ទីរពេទ្យបង្អែក១៦មករាខេត្តព្រះវិហារក្នុង ពេលនោះភ្លាមៗដែរ ។ ស្ត្រីជាប្រពន្ធឈ្មោះគង់ សុភា បានរៀបរាប់ថា ប្តីរបស់គាត់ឈ្មោះសុខ ជឹម នេះ គឺជាប្តីទីពីរដែល យកគ្នាជាប្តីប្រពន្ធ បន្ទាប់ពីគាត់លែងលះគ្នាជាមួយប្តីមុននៅឆ្នាំ២០០១ ដោយរួមរស់ជាមួយគ្នាបានរយៈ ពេល៧ឆ្នាំហើយ និងបានកូនស្រីមួយ។ ចាប់តាំងពីបានគ្នាជាប្តីប្រពន្ធថ្ងៃណាមកគាត់ពុំដែលបានសប្បាយ ចិត្តទេ ថ្ងៃណាក៏ជាថ្ងៃស្រវឹង ថ្ងៃណាក៏ជាថ្ងៃមានបញ្ហាសំរាប់គាត់ដែរ តែមិនដឹងធ្វើម៉េច បើបានគ្នាជា ប្រពន្ធប្តីទៅហើយ។ ស្ត្រីជាប្រពន្ធបានបន្តទៀតថា គាត់ត្រូវតែប្តឹងឱ្យសមត្ថកិច្ចធ្វើការចាប់ខ្លួនប្តីប្រមឹកនេះដាក់ពន្ធនាគារឱ្យ បានដើម្បីឱ្យសមនឹងកំហុសឆ្គងដែលខ្លួនបានប្រព្រឹត្ត ហើយដើម្បីទុកជាគំរូដល់មនុស្សដែលគ្មានចរិត ត្រឹមត្រូវ គ្មានសីលធម៌នៅក្នុងសង្គមបែបប្តីរបស់គាត់នេះ ។ បច្ចុប្បន្នឈ្មោះសុខ ជឹម បានរត់គេចខ្លួន ។ មន្ត្រីប៉ូលិសព្រហ្មទណ្ឌខេត្តនិយាយថា ករណីនេះសមត្ថកិច្ចកំពុងកសាងសំណុំរឿងទៅសាលាដំបូង។

រាជធានីភ្នំពេញ ៖ ស្ត្រីម្នាក់បានរងរបួសយ៉ាងធ្ងន់ធ្ងរ ក្នុងអំពើវាយប្រហារដោយទឹកអាស៊ីតពីសំណាក់បុរស មិនស្គាល់មុខម្នាក់ ។ ហេតុការណ៍នេះបានកើតឡើងនៅមុខផ្ទះលេខ៣៨ ផ្លូវលេខ៤៣២ សង្កាត់ទួល ទំពូងទី១ ខណ្ឌចំការមន នៅវេលាម៉ោង១០និង៣០នាទីព្រឹក ថ្ងៃទី៨ ឧសភា ។ ស្ត្រីដែលរងគ្រោះក្នុង ហេតុការណ៍ខាងលើនេះឈ្មោះយ៉ា សុខនីម អាយុ៣៦ឆ្នាំ ស្នាក់នៅក្នុងសង្កាត់ព្រែកប្រា ខណ្ឌមានជ័យ ។ តាមសាក្សីនៅកន្លែងកើតហេតុបានឱ្យដឹងខ្លះៗថា នៅមុនពេលកើតហេតុគេបានឃើញស្ត្រីរងគ្រោះបើក រថយន្តម៉ាកស្ព័រថេក ពណ៌ស្លែពាក់ស្លាកលេខ ភ្នំពេញ ២ព-៧២២៣ តែម្នាក់ឯង មកពិនិត្យសុខភាព (រោគស្ត្រី) នៅក្នុងគ្លីនិកសមាគមរ៉ាក់ដែលស្ថិតនៅកន្លែងកើតហេតុខាងលើ ។ សាក្សីបានបន្តថា បន្ទាប់ពី ស្ត្រីឈ្មោះយ៉ា សុខនីម ពិនិត្យជំងឺហើយក៏បានដើរចេញពីក្នុងគ្លីនិក តែខណៈដើរដល់រថយន្ត ដែលចតនៅ មុខគ្លីនិកហើយបើកទ្វាររថយន្តឡើងជិះបំរុងបើកចេញទៅកាន់លំនៅឋានវិញ ស្រាប់តែមានបុរស២នាក់ ស្លៀកពាក់ស៊ីវិលជិះម៉ូតូម៉ាកវីវ៉ាពណ៌ខ្មៅ ស៊េរីទំនើបមួយគ្រឿង មកឈប់ក្រោយរថយន្តស្ត្រីរងគ្រោះ ហើយធ្វើសកម្មភាពជះទឹកអាស៊ីតដែលដាក់ក្នុងកាជ័រមួយ ស្រោចពីលើបណ្តាលឱ្យរងរបួសរលាកអស់មួយ ចំហៀងខ្លួន។ ក្រោយពេលកើតហេតុ ស្ត្រីរងគ្រោះត្រូវបានក្រុមគ្រូពេទ្យនៃគ្លីនិករ៉ាក់ ជួយសង្គ្រោះ រួចហើយត្រូវបានក្រុមគ្រួសារនាំយកទៅសង្គ្រោះបន្តនៅមន្ទីរពេទ្យកាល់ម៉ែត ។ នៅកន្លែងកើតហេតុស្ត្រីឈ្មោះយ៉ា សុខនីម បានរៀបរាប់ថា រូបគាត់ពុំដែលធ្លាប់មានទំនាស់ជាមួយ នរណាទេ ហើយរូបគាត់ក៏ជាមនុស្សមានប្តីសីត្រឹមត្រូវ ដោយពុំមានពាក់ព័ន្ធជាមួយនរណាក្នុងរឿង ស្នេហាត្រីកោណអ្វីដែរ ។ ទោះបីជាបែបណាប្រភពមួយនៅកន្លែងកើតហេតុបានឱ្យដឹងថា ស្ត្រីរងគ្រោះ បានទូរស័ព្ទទៅពឹងពាក់អង្គការផ្សេងៗដើម្បីជួយការពារអាយុជីវិតរបស់គាត់ ព្រមទាំងក្រុមគ្រួសារផង បន្ទាប់ពីគាត់ត្រូវទទួលរងគ្រោះយ៉ាងធ្ងន់ធ្ងរនេះ ។ ទាក់ទិននឹងរឿងហេតុខាងលើនេះ នៅរសៀលថ្ងៃដដែលក្រុមគ្រួសារអ្នកស្រីយ៉ា សុខនីម បាននាំគ្នា មកដាក់ពាក្យបណ្តឹងនៅទីស្នាក់ការនគរបាលប៉ុស្តិ៍ទួលទំពូងទី១ រៀបរាប់អំពីដំណើររឿងដែលអ្នកស្រី យ៉ា សុខនីម ទទួលរងនូវការគំរាមតាមទូរស័ព្ទពីសំណាក់បុគ្គលមួយរូបមុនពេលកើតហេតុនេះ។ អ្នកស្រី យ៉ា ស៊ីយ៉េត អាយុ៤៦ឆ្នាំ ត្រូវជាបងស្រីបង្កើតរបស់ស្ត្រីរងគ្រោះយ៉ា សុខនីម ហើយជាម្តាយរបស់កញ្ញាអ៊ិន សូលីដា ដែលជាតារាសំដែងកាយវិការខារ៉ាអូខេ និងជាអតីតបវរកញ្ញាទេសចរណ៍អន្តរជាតិកម្ពុជាផងដែរ។ អ្នកស្រីជាម្តាយបានលើកដៃសំពះស្រែកយំ នៅក្នុងទីស្នាក់ការនគរបាលប៉ុស្តិ៍ទួលទំពូងទី១ សុំឱ្យសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជួយរកយុត្តិធម៌ដល់ ក្រុមគ្រួសារគាត់និងជួយការពារអាយុជីវិតពួកគាត់ផង ព្រោះបន្ទាប់ពីប្អូនស្រីរបស់គាត់ទទួលរងនូវការ វាយប្រហារដោយទឹកអាស៊ីត គឺរូបគាត់ជាបងស្រីបង្កើតរបស់អ្នករងគ្រោះ ព្រមទាំងក្រុមគ្រួសារទាំងមូល ក៏មានការព្រួយបារម្ភយ៉ាងខ្លាំងអំពីសុវត្ថិភាពរស់នៅ ព្រោះមានការទទួលរងនូវការគំរាមកំហែងពីស្ត្រី ម្នាក់ ពាក់ព័ន្ធនឹងរឿងកូនស្រីរបស់គាត់ គឺកញ្ញា អ៊ិន សូលីដា ដែលបច្ចុប្បន្នគាត់មិនដឹងថាកូនស្រីជាទី ស្រឡាញ់នោះស្ថិតនៅទីណាទេ ។ សូមបញ្ជាក់ថា កូនស្រីរបស់ស្ត្រីឈ្មោះយ៉ា ស៊ីយ៉េត ដែលត្រូវជាក្មួយស្រីបង្កើតរបស់អ្នកស្រីយ៉ា សុខនីម ជាស្ត្រីរងគ្រោះ គឺឈ្មោះ អ៊ិន សូលីដា អាយុ២៤ឆ្នាំ នាងធ្លាប់ជាប់ជាបវរកញ្ញាទេសចរណ៍ លំដាប់ថ្នាក់លេខ៥ នៅក្នុងចំណោមប្រទេសចំនួន៣២ក្នុងការប្រកួត ហើយចាប់ពីពេលនោះមក នាង បានចូលប្រឡូកក្នុងការថតផ្សាយពាណិជ្ជកម្ម និងសំដែងជាតារាខារ៉ាអូខេ តែប៉ុន្មានឆ្នាំចុងក្រោយនេះនាង បានបាត់មុខពីការសំដែង និងលេចមុខម្តងៗ។ តាមទស្សនាវដ្តីខ្លះ ដែលបានចុះផ្សាយពីនាង ត្រូវបានអ្នក ស្រីជាម្តាយបានហៅអំពើវាយប្រហារដោយទឹកអាស៊ីតលើប្អូនស្រីរបស់គាត់នេះថា អាចជាប់ពាក់ព័ន្ធទៅ នឹងការបាត់ខ្លួនកូនស្រីរបស់គាត់ ដែលការបាត់ខ្លួននោះទំនងជានាងបានគេចពីច្រវាក់លោកិយ ដែលធ្វើ ទុក្ខទារុណលើរូបនាង។ អ្នកស្រីបានសុំឱ្យស្ថាប័នរដ្ឋាភិបាល ពិសេសគឺ សម្តេចតេជោ ហ៊ុន សែន ជួយអន្តរាគមន៍ផ្តល់យុត្តិធម៌ និងការពារដល់ជីវិតក្រុមគ្រួសារគាត់ទាំងមូលផង ព្រោះពួកគាត់គ្មាននរណា ទីពឹងក្រៅពីសម្តេចនាយករដ្ឋមន្ត្រីឡើយ។ មន្ត្រីសមត្ថកិច្ចបានកត់ត្រាអស់ហើយចំពោះការលាតត្រដាង រឿងរ៉ាវសង្ស័យនានាពីម្តាយ របស់កញ្ញា អ៊ិន សូលីដា ដែលត្រូវជាបងស្រីអ្នករងគ្រោះ ហើយមុន ពេលកើតហេតុនេះ អ្នកស្រីបានអះអាងថា បានទទួលការគំរាមជាមុន ពិសេសគឺសួររកកញ្ញា អ៊ិន សូលីដា ដែលបាត់ខ្លួនតែម្តង ។ សមត្ថកិច្ចមូលដ្ឋានមិនមានការអត្ថាធិប្បាយអ្វីទេ ដោយគ្រាន់តែនិយាយថានឹងចាត់ការបណ្តឹងទៅតាម នីតិវិធីនៃច្បាប់ ។